पाँचौँ आरबीबी एनभीए राष्ट्रिय महिला तथा पुरुष भलिबल क्लब च्याम्पियनसिपको महिलातर्फको उपाधि सशस्त्र प्रहरीको एपीएफ क्लबले जितेको छ।
राष्ट्रिय खेलकुद परिषद्को कभर्डहलमा शुक्रबार भएको फाइनलमा होंगान्जी न्यु डायमण्ड स्पोर्ट्स क्लबलाई ३–१ को सोझो सेटमा पराजित गर्दै एपीएफले उपाधि उचालेको हो।
प्रतिस्पर्धात्मक खेलमा एपीएफले पहिलो सेट २५–२३ ले आफ्नो पक्षमा पारेको थियो। दोस्रो सेटको अन्तिममा न्यु डायमण्डले लय गुमाउन पुग्दा सेट २५–२१ ले सुम्पियो।
तेस्रो सेट २२–२० को अवस्थामा हुँदा प्रतिभा माली स्पाइक प्रहार गरेपछि लड्न पुग्दा खेल रोकिएको थियो। गम्भीर चोट बोकेपछि प्रतिभालाई हस्पिटल लागिएको छ। सो सेट न्यु डायमण्डले २५–२३ ले जित्यो। चौथो सेटमा एपीएफ २५–१८ ले विजयी हुँदै उपाधि रक्षा गर्न सफल रहयो।
शुक्रबार नै तेस्रो स्थानका लागि भएको खेलमा आर्मीको दुवै टोलीले पुलिसलाई सोझो सेटमा पराजित गरे। पुरुषतर्फ आर्मीले २५–१८, २५–१८, २५–२० को अन्तरमा जित दर्ता गर्दै ५० हजार रुपैयाँ हात पार्यो। महिलातर्फ पनि आर्मी २५–२२, २५–१३, २५–२१ ले विजयी रहयो।
प्रतियोगिताका दुवैतर्फका विजेताले २ लाख, उपविजेताले १ लाख र तेस्रो हुने टोलीले ५० हजार रुपैयाँ प्राप्त गर्नेछन्। त्यस्तै दुवैतर्फका सर्वोत्कृष्ट खेलाडीले समान २५ हजार पाउनेछन् । विधागत उत्कृष्टले समान १० हजार रुपैयाँ पाउनेछन्।
