चीनको हुबेई प्रान्तको वुहान शहरबाट कोरोना भाइरसको संक्रमण सुरुवात भएको थियो।
गत डिसेम्बरमा देखिएको उक्त भाइरसको संक्रमणबाट हाल चीनमा ५६ जनाको मृत्यु हुनाका साथै झन्डै दुई हजार बिरामी परेका छन्।
कोरोना भाइरसको खतरासँग जुध्न अनुसन्धानमा खटेका चिनियाँ अधिकारीहरुले आइतबार यस भाइरस लक्षण देखा पर्नु अगाडि नै फैलिने बताएको बीबीसीले जनाएको छ।
यस भाइरसलाई नियन्त्रण गर्न चीनले विमान उडान तथा अन्य यातायातका माध्यम ठप्प पार्नुका साथै विभिन्न शहरहरु बन्द गरिदिएका छन्।
चिनियाँ स्वास्थ्यमन्त्री मा साओवीले कोरोना भाइरसको महामारी गम्भीर चरणमा प्रवेश गरेको बताएका छन्।
मानिसबाट पनि भाइरस संक्रमण हुन थालेको पत्ता लागेपछि यसको त्रास झनै बढेको छ। विभिन्न देशले चीनको वुहानमा उडानहरु स्थागित गरेका छन्।
चीन सरकारले शनिबारमात्र यस भाइरस नियन्त्रण गर्न एक विज्ञ टोलीको गठन गरेको छ। सरकारले हजारौं स्वास्थ्यकर्मीहरु वुहान शहरमा उपचारको लागि पठाएको छ। बीबीसी
