नेकपाको महाधिवेशन ०७७ चैत्रमा राष्ट्रिय महाधिवेशन

0
40

काठमाडौं, १९ माघ । नेपाल कम्युनिष्ट पार्टी (नेकपा)को एकता महाधिवेशन आगामी २०७७ चैत मसान्तमा हुने भएको छ ।

नेकपाको केन्द्रीय कमिटीको बैठकले महाधिवेशनको मिति तय गरेको हो ।

आइतबार सम्पन्न भएको केन्द्रीय समिति बैठकले उपाध्यक्षमा बामदेव गौतमलाई निर्वाचित गरेको छ ।

एकतापछि कार्यसूचीसहित विस्तृतरुपमा आयोजना गरिएको बैठकले अध्यक्षद्वयको राजनीतिक प्रतिवेदन तथा महासचिवको साङ्गठनिक प्रतिवेदन र विधान संशोधन प्रस्ताव परिमार्जनसहित सर्वसम्मतरुपमा पारित पनि गरेको छ ।

१५ माघदेखि काठमाडौँको राष्ट्रिय सभागृहमा आयोजित बैठकमा विभिन्न निर्णय र ११ बुँदे समसामयिक प्रस्ताव पारित गरी बैठक समापन गरिएको छ ।

पार्टीका प्रवक्ता नारायणकाजी श्रेष्ठले अर्को वर्ष २५ चैतदेखि ३० गतेसम्म राष्ट्रिय महाधिवेशन आयोजना गर्ने निर्णय गरेको बताए ।

त्यसअघि जिल्ला र प्रदेश अधिवेशन सम्पन्न गर्ने निर्णय भएको उनले बताए ।

सङ्गठनात्मक र जनपरिचालनका लागि तत्कालै तीनमहिने राष्ट्रिय अभियान सञ्चालन गर्ने तय भएको उनले बताए ।

बैठकमा सदस्यको सुझावका आधारमा पार्टीमा गुटबन्दी र पूर्वघटकको मान्यता माथिल्लो तहबाटै अन्त्य गराउन दुवै अध्यक्ष केपी शर्मा ओली र पुष्पकमल दाहाल ‘प्रचण्ड’ ले सङ्कल्प गरेका छन् ।

शीर्ष नेताको सम्पत्ति छानबिन गर्न उठेको विषयलाई केन्द्रीय अनुशासन आयोगले अध्ययन गर्ने र निर्वाचन प्रणालीलाई कम खर्चिलो बनाउन र जनमुखी प्रणाली स्थापित गर्नका लागि बहस सञ्चालन गर्ने निर्णय पनि भएको छ ।

बैठकमा अध्यक्ष एवं प्रधानमन्त्री ओलीले सरकार पार्टीले गरेको निर्देशानुसार सञ्चालन हुने तथा सरकारले गरेका राम्रा काममा पार्टीको समर्थन र तिनको प्रचार हुनुपर्ने आग्रह गरे ।

पार्टीमा वैचारिक छलफल र स्कूल सञ्चालन हुनुपर्नेमा जोड दिँदै उनले वर्तमान सरकारले भ्रष्टाचारीलाई पक्राउ र कारबाही बढाएकाले भ्रष्टाचार बढेको जस्तो भान परेको बताए ।

बैठकमा उठेका विषयमाथि नेतृत्वका तर्फबाट जवाफ दिँदै अध्यक्ष दाहालले बैठक असाधारण रहेको र यसले आफूहरुलाई विकृति र विसङ्गतिबाट सच्याउँदै अघि बढ्न निर्देश गरेको स्पष्ट गरे ।

बैठकले १६ कात्तिकमा नेपालका लिम्पियाधुरा, लिपुलेक र कालापानी क्षेत्रलाई समेटेर भारतले प्रकाशन गरेको राजनीतिक नक्शालाई अमान्य भएको जनाएको छ ।

The post नेकपाको महाधिवेशन ०७७ चैत्रमा राष्ट्रिय महाधिवेशन appeared first on Koshi Online.

तपाईको प्रतिक्रिया
यो सामग्री पढेर तपाईलाई कस्तो लाग्यो ?
+1
0
+1
0
+1
0
+1
0
+1
0
+1
0
+1
0