सावित्राको २ गोलसँगै गाेकुलम आईलिगकाे फाइनल प्रवेश

0
69

डिफेन्डिङ च्याम्पियन सेथु एफसीलाई पराजित गर्दै राष्ट्रिय टोलीकी स्ट्राइकर सावित्रा भण्डारी साम्बा सम्मिलित गोकुलम केरला एफसी भारतीय महिला लिगको फाइनलमा प्रवेश गरेको छ।

ब्याङ्ग्लोर फुटबल स्टेडियममा सोमबार भएको सेमिफाइनलमा राष्ट्रिय टोलीकै अर्की सदस्य अनिता बस्नेत सम्मिलित सेथु एफसीलाई ३–० ले पराजित गर्दै गोकुलमले फाइनलमा स्थान बनाएको हो।

आजको खेलमा सावित्राले २ गोल गरिन्। लिग चरणका सबै खेलमा पहिलो रोजाइमा मैदान उत्रेकी सावित्राले सबै खेलमा गोल गरेकी छन्। छनाेट चरण र लिगमा उनले हालसम्म ७ खेलमा १८ गाेल गरिसकेकी छिन्।

खेलको ४३ औं मिनेटमा सावित्राले गोल गर्दै अग्रता दोब्बर पारेकी थिइन्। खेलको ८२ औं मिनेटमा सावित्राले व्यक्तीगत दोस्रो तथा टोलीका लागि तेस्रो गोल गरेपछि टोलीको जित पक्का भएको थियो। त्यसअघि २१ औं मिनेटमा मनिसाको गोलमा गोकुलमले अग्रता बनाएको थियो।

गोकुलमले उपाधिका लागि कृस्पा एफसीसँग खेल्नेछ। आजै भएको पहिलो सेमिफाइनलमा कृस्पाले केन्क्रे एफसीलाई २–१ ले हराउँदै उपधि नजिक पुगेको थियो। कृस्पा समुह ए को विजेताको रुपमा सेमिफाइनलमा पुगेको थियो।

यो सिजन सावित्रा गोकुलम केरला एफसी र अनिता साविक विजेता सेथु एफसीबाट खेलिरहेका छन्। सेथु समूह ‘ए’ को उपविजेता र गोकुलम समूह ‘बी’को विजेताका रुपमा अन्तिम ४ मा पुगेका हुन्। समूह चरणमा सावित्राको टोली अपराजित रहँदा अनिताको टोलीले एक खेलमा हार व्यहोरेको थियो।

आजको खेलमा सावित्रा प्लेयर अफ द म्याच भइन्।

तपाईको प्रतिक्रिया
यो सामग्री पढेर तपाईलाई कस्तो लाग्यो ?
+1
0
+1
0
+1
0
+1
0
+1
0
+1
0
+1
0